Jean Schoos

Am Band „Attentat - Dem Fischbach säi 5. Fall“ weist sech de Fischbach vun enger anerer Säit: Seng laang Déngschtzäit an déi vill Réckschléi, déi en a senger Karriär huet misse verquëssen, hunn hir Spueren hannerlooss, an de Juegdhond, wéi e genannt gouf, huet säi Bëss verluer. Mee zwee Fäll loosse säi Juegdinstinkt nees erwächen: en Uschlag op d‘Bunn an eng Läich vun engem vermeintleche Journalist am Stauséi. Op der Sich no handfeste Beweiser wot de Fischbach sech op geféierlechen Terrain - Stress an Opreegung, déi senger Gesondheet net guttdinn an e bal d‘Liewe kaschten - mee d‘Gewëssheet, op der richteger Pist ze sinn, léisst en net rouen an e bäisst sech soulaang fest, bis nach een aneren d‘Heft an d‘Hand hëlt ...

De Jean Schoos ass an der Stad gebuer, wou hien och opgewuess ass. 1966 huet hie seng Première am Jongelycée gemaach an ass duerno op de Mathematikscours gaangen. Vum Wantersemester 1967 un huet hien zu Heidelberg Chimie a Physik studéiert, mee ass 1969 op Psychologie a Soziologie ëmgeklommen. Déi lescht zwee Joer vu sengem Studium an no sengem Diplom 1975 huet hien an engem Fuerschungsinstitut zu Heidelberg geschafft.

1978 ass hien heem op Lëtzebuerg komm, fir eng Plaz als Direkter vum Jongenheem, enger sozialer Ariichtung fir Kanner a jonk Leit, unzehuelen. Hien ass an dëser Funktioun bis 2011 bliwwen, wou hie pensionéiert ginn ass.

Musikalesch Begleedung: Nathalie Morettoni & Pol Belardi